Косача ва илон” рамзининг келиб чиқиши ҳақида

Нега айнан шу рамз қўйилган? Бугунги кунда дорихоналар, фармацевтика уюшмалари ва фармацевтлар фаолиятида кенг қўлланиладиган “Косача ва илон” (Bowl of Hygieia) рамзи қадимги юнон мифологиясига бориб тақалади. Қадимги юнонларда табобат худоси Асклепий (Asclepius) бўлиб, унинг қизи Гигия (Hygieia) соғлиқни сақлаш ва профилактика маъбудаси сифатида эъзозланган. Афсоналарда у қўлида косача тутиб, унинг устидан илон эгилиб турган ҳолда тасвирланади. Илон — донолик, шифо ва табиат кучини, шунингдек дори ва заҳар ўртасидаги нозик чегарани англатади. Косача — ҳаётбахш ичимлик ёки дори тайёрланадиган идиш рамзи ҳисобланади. Шу тариқа, “Косача ва илон” фармациянинг — яъни дориларни яратиш ва уларни тўғри қўллаш санъатининг тимсоли сифатида тан олинган. XX аср бошларидан бошлаб ушбу рамз Европа ва Америка фармацевтика жамиятлари томонидан расмий белги сифатида қабул қилинган. Бугунги кунда у АҚШ, Германия, Франция, Англия, Канада, Австралия каби кўплаб мамлакатларда фармацевтлар уюшмалари логотипларида, дорихоналар белгиси сифатида ва турли тиббий муассасаларда учрайди. Шуни ҳам айтиш лозимки, Асклепий таёқчаси (бир дона илон ўралган таёқ) тиббиётнинг умумий рамзи сифатида ишлатилса, Косача ва илон рамзи фармацевтика соҳаси учун хосдир